شعر شعبي رومانسي بالعامية المصرية اقدمه لكم اليوم زوارنا الكرام كما وعدتكم في المقالة السابقة ، وكما عودتكم علي عرض كل ما هو جديد وحصري فاليوم أيضاً هذه الأشعار تعرض حصرياً لأول مَره.
شعر شعبي غزل رومانسي
عرضت لكم في السابق زوارنا الأعزاء شعر عن الحب بالفصحى لمن يحبه ، وهناك أيضاً من يحب ويبحث عن شعر رومانسي شعبي بالعامية المصرية ، وقد جاء دوره الآن لكل من يتكلم باللهجة المصرية سواء كانوا مصريين أو من يحب التحدث بها من أشقائنا العرب ، أو من لا يتحدث بها ولكن يفهمها من أشقائنا في الوطن العربي كله من المحيط للخليج ، ويسعدني ان اقدم لكم هذه الأشعار وأتمنى أن تلقى استحسانكم.
إستعراض أسماء الأربعة قصائد
ستأتي بالترتيب كالتالي:
1- قصيدة (علي بابك).
2- قصيدة ( واقولك ايه).
3- قصيدة (ألماس خام).
4- قصيدة (عيد الفطر).
واليكم الآن عرض ابيات القصائد الأربع ، رجاءا أبلغوني بإسم أكثر قصيده أعجبتكم كلماتها وحركت مشاعركم ، اترككم مع القصائد.
...........
1- (علي بابِك)
تعرفي إني كنت في غيابك
بروح وأقعد على بابِك
وافضل مستني طول الليل
وانا عيني على شباكِك
مع إنك
صوتِك في وِدَاني
وقافلين بقالنا ثواني
وشوق عيني إنها تشوفِك
هوا اللي عَندِك وَدّْاني
بَحبِك
دي مهما اقولهالِك
ومهما تشغلي بيها بالِك
دي نقطه من مطر حبي
و قلَم شوقي كتبهالِك
وحُبِك
ده عندي بقا حكايات
لو احكيها عايزله ساعات
دا نظرة عينِك لوحدها حكايه
حكاية حب (أجمل نظرات)
وعشقِك
دا بقى شيء يتحَسّ
عن غَمز وهَمس وروح تِتْهزّ
أو عن ضحكتِك الرقيقة مثلاً
خِلص الكلام دي تِتسِمع بَسّ.
……….
2- (واقولٍك إيه)
أحكيلِك بَسّ واقولِك إيه
عن شوقي ليكي غُلُبت اداريه
ولا قادر أتحَمِل وجَعُه
ولا حتى عارف اعمل فيه إيه
حبيبتي حتى النوم ما بنام
وإن نمت تجيني في المنام
وبسمع منك احلى كلام
قوليلي انا اعمل معاكي إيه
في كلامي وسكوتي انا فاكرك
كتاب ما بين إيدي بذاكرِك
حفظت تفاصيله وفاهمِك
واعيد وازيد من تاني انا فيه
حبيبتي حتى دموع العين
نازلين من شوقي مشتاقين
بيسألوني حبيبتنا فين
مش لاقي كلام اقولُهم إيه
وجَعتي قلبي من شوقي ليكي
كفايه بقا الله يخليكي
انا كده فعلاً هموت عليكي
ولو مش ليكي هعيش انا ليه
أحكيلِك بس واقولِك إيه.
………..
3- (ألمَاس خام)
غَمَّضت عيني حلمت بيكي
فَتَّحت عيني شوفت عنيكي
دنا من زمان مستنيكي
غيبتي ليه؟
شايلِك في عيوني ما بين رموشي
أغَمَضْ تنامي ومينَموشي
وجوه قلبي دوبي وبوشي
واسكُني فيه
أنا قلبي داب وانتي اللي ساكنه وعايشه فيه
والبُعد طال فوق احتمال قلبي عليه
ومن العذاب اداري كل الشوق دا فيه
بس كِرمال هذا الجمال توبه اخبيه
عارفه حبي ليكي قد ايه وبكام
انا في الثانيه بحبِك مليون عام
وبتَمن حجم القمر ألمَاس خام
والأرض عليه
و وحشتيني وبتوحَشيني وهتوحَشيني
رغم إن صوتك فوِدنِي وصورتك فعيني
وبرضوا هشتاقلك في وقت ما بتحضنيني
وأشبع ليه؟
و بَحِسّ بيكي قبل مني
رغم المسافه مسئوله مني
منتي روحي عمري ونني
فيه تاني إيه؟.
……….
4- (عيد الفطر)
أي حاجه لما بشوفها
حلوه في عنيا بفتكرك
وأقف وأحتار في جمالها
اتاري بتاخُد جمالها منك
مانتي المطر والنور والفجر
وانتي القمر لما يكون بدر
وانتي أمنيتي في ليلة القدر
وفرحة صومي وعيد الفطر
والجمال ينقص في وجودك
ويكمل لما يكون شَبَهِك
والدلال يرقُص في حدودِك
ويفرح لو اتنَادى بإسمِك.
………..
هذا وأرجو أن تكون هذه الأشعار قد نالت رضاكم وإعجابكم زوارنا الكرام ، وانتظروا مني قريباً مزيد من الأشعار الحصريه التي أعرضها لكم لأول مرة علي مدونتكم كلمة بوست.
………...
تعليقات
إرسال تعليق