القائمة الرئيسية

الصفحات

قصائد الشاعر عمرو حسن . اجمل ما قال الشاعر عمرو حسن

قصائد الشاعر عمرو حسن . اجمل ما قال الشاعر عمرو حسن


اجمل اشعار للشاعر الموهوب عمرو حسن التى تميزت اشعاره للاحساس الصادق ❣️❣️.

اشعار عمرو حسن


قصائد الشاعر عمرو حسن . اجمل ما قال الشاعر عمرو حسن

قصيدة جوابي ده الأخير ليكى

جوابي ده الأخير ليكي
يامعاليكي
ياست الحسن
ياسبب الحزن والعلة
ياشجرة حسبتها ضله وطلعت نار
بداية القول : مساء الخير علي الأزهار على خدودك
مابنجرّحش
ومابنسمحش حد يقول كلام عنك
لذلك ثم أما بعد ،
أنا الطفل اللي كان ف عنيكي متشعبط
يشوفك روحه تتلخبط
وقلبه ابن الحرام يضعف ويستعبط
كإنك زار وانا الدرويش
كإنك غار وانا الحرافيش
كإنك كنتي قرش حشيش
دخل رئتيني وملاني
كإنك دار وانا اللي ماليش
سوا الدار اللي لمّاني
بغض الجرح مين خان مين
ومين قصّر مع التاني
وغض الطرفْ عن اسمك
وطعم خروجه ف لساني
أنا مليّت من القصة ومن لعبة خلاص لسه
لقيتك غيمة ف حياتي حسبتك مطره قمت جريت
وفجأة لقيت مفيش غير ليل
سحابة ضلمة كنتي انتي
اشوفك ف الوجع بنتي
واحسك ارضي وسفينتي
وشمس بتملا ليلي شروق
مافيش كام يوم لقيتني بافوق
واشوف القاتل الفعلي
لقيتك أرض ماتضمش سوى المطاريد
وانا عيل بيفتح إيد يشوفك خط على كفه
عنيا عيال اذا بصيتي يتدّفوا
حسبتك أم بتدوّر رحى الأحضان على عيالها
لقيتك ماسكة كاتم صوت
رصاصك فات وجع جواي
وهو ياحلوة يعني الموت
بيفرق شكله كان ازاي
وهو الجرح للستات ومش لينا ؟
ما فيه رجالة بتعيّط
وفيه رجالة بتفكّر ف عز الليل ف ناس باعوا
وفيه راجل اذا فات ف المحيط وجعه مابيساعه
وفيه عناوين بتتلخبط
وفيه بكره بيتشخبط
وفيه أطفال مايتولدوش ف مستقبل ماجاش قدام
وفيه زفة مابتقومشي
وفيه فرحة مابتدومشي
وفيه نغزة ف صميم الروح
ما دام ف القصة فيه دابح
أكيد ف القصة فيه مدبوح
ولو كان القتيل راجل
ف دمه بيبقي مش بالسهل
خسرتي معاه وجود الأهل
خسرتي الضهر والضمه
خسرتي الجمع واللمة
وبكره هتندمي لما
تحسي البرد من دونه
ياريتك شوفتي ف عيونه دموع الأب
أنا الشخص اللي كله ذنوب
لكن مليان حاجات تتحب
ــــــــــــــــــــــــــــــــــ
عملت حاجات لأول مرة بعملها
وكِملِت أغنيات بيكي
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب
عكستي المشهد المكتوب
ماكانش الفيلم دي نهايته
كده الكاتب لعب ف النص
وفيه لزق ف حياتي وقص
وفيه تركيب لناس تانية
فيه مشهد خارجي مش محطوط
أنا وانتي
ومطرة بتغسل الشارع من الاحزان
حضنتيني زمان ومكان
وقولتيلي مافيش غيرك
نزلت ف لحظة على ركبي وانا ف ايديا كام وردة
ضحكتيلي
وطبطبتيلي علي خدي
كانك كنتي بتعدي على قلبي بروح حافية
مسكت الدمعه بالعافيه وضميتك ف عز البرد
لقيتني الفيلم بالكامل مافيش ولا لقطة ماسك ورد
طلع فيه حاجات بتتصور
بتتقصقص من المونتاج
وأول ما المطر لمسك
لقيتك دوبتي ف المكياج
عروسة حلاوة أو صورة
ملامح فازة مكسورة ف اخر جزء ف الذكرى
خسارة تكمّلي بكره
يا نور ساطع بيعمي العين ما بينوّرش
انا هافضل كده عيّل ومابيكبرش
وبكره يجوز تقابليني ف أي مكان
هاشوفك وقتها دخان
بقوة ست هاعشقها ف زمان تاني
ولمسة طفل يشبهني مايشبهكيش
انا جوايا كام ميّت وحابب اعيش
لا هاتحوّل
ولا هارجع من الأول
ولا هاكتب عشانك شعر
هبيعك دون نظر للسعر
مكانك وردة ماسقيتهاش ف دبلت من خريف موجوع
دموعي رصيد باحوش فيه لناس مستاهلة مني دموع
وحلمي معاكي م الأول
خطيئة لابد اكفّرها
رميتك طفل ببراءته
ندم على حاجة وكسرها
يا أسوأ حلو كان فيّا
يا أطيب شر ف النية
كسبت حاجات تسيء ليا
وجه الوقت اللي انا اخسرها
……...

قصائد الشاعر عمرو حسن . اجمل ما قال الشاعر عمرو حسن

قصيدة: هيبتا

نبدأ منين؟
من صدفة في الشارع
أو شارع الصدفة
أو أي شيء مدهش بيتم بين اتنين
من التقاء العين
أو من حاجات تانية
تبدأ من الدنيا
على اعتبارها كمين
بين إحنا والتانيين
ويبدأ التدوين
من أول السيرة


الصدفة تجمعنا
زي اللي خارج من كافيه بالليل
يخبط في كتف مهندسة بترول
أو عاملة في مصنع
تسقط ما بينهم أغنيات صدفة
لا يوطوا يجنوها ولا يسيبوها تكُف
– تكبر هنا شجرة مجهولة المصدر وشكلها مختلف –
تنمو بفعل الوقت
وتصير مخازن للطيور والقش
البذرة صدفة والفروع علاقات
بالتالي يا حضرات
لا تُهملوا الخطوات أو تمشوا مش شايفين
هتدوسوا على علاقات وبواقي بني آدمين
فتوخوا بعض الحذر
أو امعنوا في النظر
جايز تشوفوا اتنين واقع مابينهم شيء
هيكون لبكرة طريق
يشبه طريق بكرة
واتأملوا الحكايات
اتأملوا الحكايات
في الدنيا ياما حاجات أكبر من الرؤية
فبنمشي مانشوفهاش
شجرة هنا بتكبر بين حد جه وماراحش
وحد راح وماجاش،،
……...

قصائد الشاعر عمرو حسن . اجمل ما قال الشاعر عمرو حسن

عن أعمال عمرو حسن

وله العديد من الدواوين منها على ناصية الشاعر، العزلة نص الونس، الفراشات، مصر الجديدة، ديوان ناس كافيه، سيلفي، من هنا للشعر وغيرها من الدواوين..
...............

قصيدة مابتحبكش

تتعب ليه
وتزرع ارض مش ارضك
و ليه سهران
ليه قلقان و مش نايم
ليه قاعد و ليه قايم تجيب في سيرتها و مشاعرك تسيل ع الارض
مابتحبكش والله
كل اللي اتعمل بينكم حكايه وقت مش اكتر
كلامه كله كان عادي
و وردك كمان عادي
وردك مرمي في الشارع من الشباك
بتضحكلك و تبقي معاك و تحلفلك تكون وياك و وقت ما تمشي بتسيبك تاريخ مهجور
حكيت للكل عنها بدون ماتتكلم
حكيت وياها عن نفسك
فتاجرت بيك
و اديها ياسيدي بتعايرك
بأسرارك
و بعياطك
قصاد منها
تجيب سيرتك و اخبارك
و تحبكها بدموع عينها
ولا صانت كلام بينكم
ولا عرفت تراعي حتي حلفانها
يا راجل دانتا علشانها
بقيت واحد ماتشبهلكش
مابتحبكش والله
..
قصه الحب الكبيره
صورك السيلفي الاخيره
اتصال بليل يضايقك
تزعلو تفضوها سيره
انت طيب .. بس غامض
هيه عاوزه حاجات كتيره
و انت ايه غير سُكر بَيِّن
من حياه منطقها .. بيره
لون هدومك
برفاناتك
كلمه السر في حياتك
الإضائه الخافته و المزيكا و انتا
- اعمل ايه لو توحشيني ؟
= انسي و اعرف واحده تانيه
- بس انا شايلك في عيني
= حظنا نبعد دي دنيا
- انتي قصدك تقتليني ؟؟
= انت ميت كل ثانيه
المحطات البعيده
شنطه السفر اللي فيها ريحه الناس و الشوارع
جلدك اللي مسامه شايله نقطه من عرق اللي راجع
الحياه رخمه و كئيبه
بس حلوه و ليها معني
احنا باب .. ندخل في نخرج
و الجميع شد و رزعنا
احنا بالفعل اتخدعنا
..
كنت واقف في الشوارع ليل و وحده
كان صحابي كلهم راحو لبيوتهم
كنت وحدي او معاها
او معاها و كنت وحدي
كلمتني عن قمر ساكن سماها
و امل مسكت ايدي فجأه
تابع القمر المفاجأه
خلي نور الشمس يتأخر شويه
ثم غابت ثم رجعت ثم دابت بين ايديا و اكتشفت بإني وحدي
او معاها
او معاها و كنت وحدي
الطبيب النفسي
ممكن ينصحك و يهز فيك
بس مش ممكن يقرر ان اللي غابو يعودو ليك
اكتئابك
رد بايك
سبت كل الناس وغبت
اللي سابك
اسمه سابك
انت عمرك يوم ما سبت
توته يا حدوتخ يا ملتوته
الواد كان حب البنوته
و عيون الحب المبسوطه
بتنزل دمعه في وسط النار
في حاجات مكتومه و مكبوته
انما لازم تفضل اسرار
و الحبكه الصح المظبوطه
تغلطي فيا و تقولي ده جار
طب حتي الجار له حقوق جيره
و الجيره في حيط بيتنا كبيره
مش كل كسور ليها جبيرها
ولا كل المعمول في السيره نعمل منه كلام و مسيره
و عسيره جراحنا مانجبرهاش
اللي في كتفي ده مش تعويره
ده جرح فراقك ماتغطاش
و اللي بيقصد في حاجات مره
تيجي مره حاجات و مايقصدهاش
يا سموك مَنِّك جه مِنِّك
الجاني اتجن بروح جِنِّك
و كإنك انك لكإنك
واحده انا باعرفها و ماعرفهاش
في كل مكان فيه ذكري معاكي متسابه
ايديا في ايدك الطفله
بعدي معاكي مالشارع
ملامحك و انتي بتسمعي فيروز
نهارك و انتي بتواجهيه بشاي بحليب
و حكاياتك عن اصحابك
فلانه بتكرهك جدآ
فلانه قالتلي ماتشوفيهوش
كلام قولتيه و كان لازم في وقت الجرح ماتقوليهوش
اكيد دلوقتي بتقولي
زمانه مولع الدنيا بيغلط كل يوم عادي
خلاص فاكك بقي و مرتاح
و انا والله في قيودك كطير من كتر ما اتقيد طلعله جناح
انا في البعد متحاوط بطيف ريحتك
و لسه لحد هذا الوقت فاكر شكل تسريحتك
و تنهيدك و شكل الساعه علي ايدك
طريقتك و انتي بتغني
( بعيد عنك حياتي عذاب )
حياتك ايه بعيد عني ؟؟
يا ارض عرفتها فجأه
و دنيا لمستها بشويش
يا اطهر من رقم فلكي في عداد اسمه اكل العيش
بتحكمي ليه علي غيابي
و في حضوري بتنسينى
رفضتي ان انتي تتسابي
و فجأه انتي اللي سبتيني
وحشتيني
..........

الجوائز التى حصل عليها الشاعر عمرو حسن

كما أنه حصل على العديد من الجوائز منها جائزة ساقية الصاوي التشجيعية (كأفضل شاعر 2010) عن ديوانه (العزلة نص الونس)، جائزة مجلة الثقافة الجديدة (أفضل شاعر 2010 )، جائزة المركزية عام 2008، أفضل شاعر ذهبية الجامعات 2009، وايضاً درع جامعة حلوان 2009، وحصل ايضاً على جائزة أحمد فؤاد نجم في دورتها الثالثة عن ديوان (باندا) لعام 2016 كأفضل ديوان في شعر العامية، كما حصل على جائزة معهد جوتة الألماني.



قصائد الشاعر عمرو حسن . اجمل ما قال الشاعر عمرو حسن

قصيدة باندا للشاعر عمرو حسن

باندا
زي مج كاكاو قديم على رف بارد م الرخام 
زي سرب من الحمام فقد الديار 
زي المطر ف ازاز فيميه 
أو زي سهم بينطلق ناحية هدف 
ماعرِفْش هو اللي اتحدف 
ولا بإرادته اختار مابين أحلام بديلة 
زي باندا ،،،
أو أقل قليلا
ابدأ نهاري بضحكتي لله 
واحشد مشاعري كلها للفرح 
أمسك واتبّت ف اللي لسه معاه
واعمل كإني قد شُفيت م الجرح
أختار مابين لبسي اللي يناسبني 
واحط سهواً ف الجيوب ذكرى 
أمي بتغسل كل شيء جوه الجاكت 
عشرين جنيه مادفعتهاش ولا خدت بالي منها 
وَصلْ الايجار ، كارت شحن قديم خدشته ومارميتوش 
لكنها ،،،
بتنسى دايماً إنها 
تغسل ريحتها م القماش 
لو هي كانت دوّرت ، كانت هتلقى ف الجيوب أغنيتي 
هتلاقي بنت ف جيب قصاد القلب 
طلقة رصاص أثر الفراق المشترك 
بس احتراماً للشَرَك 
كان لازم أمي تسيبها للذكرى 
وتسيب لبكره ذكرى مانسيتهاش
زي باندا ،، 
كل شيء ليها انقرض 
إلا السجاير .. والمرض .. بالبرد والخوف والزحام 
باصحى وانام 
وكإني دوبلير حد تاني بالتمام 
وكإني باصحى عشان انام 
زي باندا بامُر وحدي ف الشوارع
باسمع موسيقى تردني ليها 
واهرب إليها تردني ليا 
كلمت صاحبي الصبح وعزمته 
" صاحبي اللي فاضل ف الحاجات الملح " 
اقسم معاه دخان سجاير ربما 
يعمل سما واعمل مراكب من ورق 
احكيله عن عمر اتسرق 
يشتمني بيا وبالوجع 
" لساك وسخ ، انا كلب أصلا اني جيت .. مانا كنت قاعد باشا مبسوط ف الكافيه ، رديت عليك علشان تنكد ع اللي جابني بشكوتك ؟ اشرب يا زفت ف قهوتك وتعالى نعمل شيء جديد " 
صاحبي اللي فاضل ف الوريد 
ظهر النهاردة ف صورة الدم بكثافة 
ضحك الطبيب وكتبلي حقنة مسكنة 
أنا ليا مين غير الصحاب والأمكنة ؟!
رتب صحابك ع الورق حسب الوجود وقت الألم 
واعمل خطوط تحت اللي فاضل منهم 
تحت اللي لسه بيفهمك ويكلمك 
تحت اللي لما بتنسى هو يفكرك 
تحت اللي غاوي يقدرك 
وان كنت عاجز .. يحضنك ككمنجة قابلت لحنها 
يولع كلامكم جنب حاجة بحبها 
انا كل ما اجي وافُك جسمي واعلقه 
ما قابلش جزء بصدقه الا الكفوف ف الضهر 
الا الضوافر وقت حضن مابعد شوق 
وكإني غيمة ومطرت على فوق 
وكإني باندا كل شيء ليها انقرض ولا زلت عايش لجل اكون عبره 
بما اني خبره ف أغنيات فيروز 
ولإني جداً أو لإني يجوز 
ولإني فعلاً م الفراق ادمنت 
أنا خُنت نفسي لما كنت اتخَنْت 
وحرقت بنزين رحلتي على ايه ؟
واحدة ف يناير ماشية ف الشارع 
خليتني ليه بصتلها 
ركبت ناس مركبتي ليه ؟ 
الكل عامل نفسه نوح ورماني وحدي للطوفان 
طيب عبيط صدقتهم من امتى كان الموج ضمان ؟؟
هو انتوا مين ؟
ومليتوا ليه كل الصور لما انتوا هتبيعوا ببلاش 
الكادر صادق ناحيتي والغلطة جاية من الفلاش 
هو انتوا مين ؟؟ وانا ليه حزين على ترككم ؟؟
انا ليه لقيتني باحبكم 
أو ليه لقيتكم م الاساس !
أنا باندا تعبت م الخسارة المفرطة 
بدلّت كل الراحلين بأغاني كانت زيهم 
القهوة فن اللاشفاء من حُب خلق كرهتهم
والروج بتاع البنت لساه ع الجاكت 
غنيت وصوتي ف المدى لاصوت :
خماره جسمك ضحكتك بيره 
يا اللي انتي ذكرى صغيّرة كبيرة 
مريّت عليكي كرسي مش مليان 
وشربت فنجانك يا ست الأوليا
كان السحاب القطن ممزوج بالنزيف 
سمّوه غروب وطاوعتهم ف التسمية 
وانا من ساعتها اتنين ف واحد باشربك 
باستغربك ...
ولقيتني باندا مهددة بالانقراض 
على افتراض انك بجد على افتراض 
وعلى افتراض اني بجد 
مابقيتش بتفائل بحد 
مابقيتش بتقرّب لحد 
عايش مجرد تكملة لشريط قديم 
مستني باندا ف عصر ما 
تؤمن بتوزيع الحياة 
وتكون كمثلي مهددة بالانقراض 
نقسم سوا الفنجان ف دهشة من البشر
دبّين ف عالم خالي الا من حجر 
وساعتها يمكن تبتسم فيروز 
والقهوة تبقى قهوتين بالوقت 
أنا كنت باندا بس صرت تمام 
أو هابقى باندا بس مش دلوقت ..
…..

قصائد الشاعر عمرو حسن . اجمل ما قال الشاعر عمرو حسن

عن نشأة عمرو حسن

عمرو حسن من مواليد الأسكندرية حي العصافرة، ولد عام أغسطس 1987، وحصل على بكالريوس التجارة من جامعة قناة السويس عام 2010، ولكنه بدأ حياته الفنية وكتاباته في الشعر في عام 2004، كما أنه أهتم بلعب الكرة والقراءة وأحب سماع المزيكا حباً شديداً..
ولد عمرو حسن في أسرة بسيطة وفي ظروف معيشية صعبة جداً، وكان والده يعمل بالترجمة، ولكنه تركها بعدما حدث التطور الهائل في مجال الترجمة، وأنتقل حسن للعيش بالأسماعيلية ولكنه تركها بعد فترة معينة وأنتقل للعيش فى القاهرة،
….

قصائد الشاعر عمرو حسن . اجمل ما قال الشاعر عمرو حسن

قصيدة مصدقتكش

مصدقتكش
كلام الناس وصدقتِك 
زرعت بكل شيء فيا طيابة وخير
وجيتلك غير
وجيتلك شاري مش بايع 
برغم اني البعيد صايع 
ولا ليا ف غرام ولا زفت 
لكني حلِفت 
وحلفان الأصيل دستور 
بإني ببصِلك بغرور 
وعايزك ليا أبد العمر 
عرفت ازاي اغنيلك واقولك شعر 
عرفت ازاي صعيدي يجيب ورود للبنت 
وعلمني الوصول ليكي ان مهما حزنت 
فيه أجمل 
وفيه أشياء بتستاهل 
طلعت بعلمي شيخ جاهل 
وفيه في الدنيا ناس بتبيع هواية وحُب 
بدون أسباب ولا خلافات ولا فرق ف مكانه وقُرب 
أنا سيبتك عشان ماعشانش 
كده وخلاص
طلع فيه ناس تشيلهم بالزمن ع الراس وماتقدّرش
هواة جمع اللي حبوهم ف كام برواز 
حسب تواريخ تواجدهم 
وحسب الشكل والمضمون ونوع الحب وظروفه 
وبتقولوا بنكره ليه ؟
من الحزن اللي بنشوفه 
أكيد يعني ماقررناش نكون غُربا ومكتئبين 
ما م الناس اللي خذلونا 
وحبونا مسافة وقت أو لفراغ
أو لجنون مرض اسمه " هلاقي واسيب " 
شبعنا من البشر تجريب
وانا شبعتك جعان وصلك 
كريم أصلك ماهانش عليكي تسيبيني بدون شكراً 
كإني خدمة العملاء ياعسولة 
كإن عنيا مسئولة عشان حبت
أقولك ايه ؟
ماعادش كلام 
مانا معرفش تمني بكام 
مجرد ضيف ظهر جنبك ف كام صورة 
وخلصتوا الكلام بالليل غنا ومواويل
وشعر جميل مالوش داعي 
لا والنكتة ان انا فكّرت يجمعنا مكان بالوقت 
اديني نهيت مكان ما بدأت 
زهقنا كلام عن البنت اللي مجروحه 
وعن ماعرفش مين عمل ايه 
وعن ظلم الرجال تماً لنوع حوا 
وعن ديب النياب طله مابين ضلعه بينهش بنت 
زهقنا كلام عن الخاين وع الكداب 
كإن الباب مابيدخلش غيرنا احنا 
كإن ياعيني سرب ملايكه محاوطنا 
اكلمكم انا عن حد 
كان وبجد بيفكر يراعيها 
ماكانش بيزرع الاشعار سوى فيها 
وكان بيقول : انا عاصي وناوي اتوب 
بشع انك تكون غلطان ووقت ماتبقى شيء صالح تبات مغلوب
بتتغير عشان تخسر
بتتحوّل لشخص جديد عشان تندم وتتعاقب
ماصدقتش كلام الناس وصدقتك 
مخدر مر ف ضلوعي مسافة عشق 
سجاير من وجع وضمير ولحظة صدق 
تقرب يبعدوا عنك وتبعد تبقى أغلى الناس 
أقولك ايه وانا لوحدي 
رجعت مكان ما لقتيني 
ازاة خمرة ف الشارع رماها الوقت 
ببص على البشر خايف 
غشيم عشمان ف دراعاته وخايف من غرام كداب 
طلع في الدنيا ناس بتحن لو تتساب 
وانا أصبحت مش زيي وانا معاكي 
انا والله مش باكي عليكي ف شيء 
لكن باقي عليكي ف شيء 
بآخر أب متفضل ف علاقتنا 
وآخر أم نسيتيها ف حضن قديم 
هاسيبك شيء بيتسرب مع الأيام 
واصحّي طفل كان جنبك بحُب ينام 
سلام علشان خلاص ضيعتي 
عشان ضيعتي خلاص 
وسلام سلام
…..
قصائد الشاعر عمرو حسن . اجمل ما قال الشاعر عمرو حسن

قصيدة ميعاد مناسب القيامه

ف ظرف غير الظرف ده 
كان ممكن اشرب كاس واهلفط بالكلام 
أو أجُرّ نفسي من سكات 
تلاقوني متعلّق ف يافطة اعلانات 
مشنوق بوجعي من اللي فات أو م اللي جي 
بس الدراما بتقترح 
اني ابقى حيّ
دوري اللي مكتوب ع الورق بالجبر 
عامل نضافه ف بار - أو صوت موسيقى ف قبر 
أو شخص مستعجل على وقت مابيمشيش
- كل الحشيش بيودّي على نفس الطرق - 
- كل الطرق بتودّي لسجارة الحشيش -
مكتوبلي اعيش 
احضر زمن مجرم 
رديء وسخيف 
أبص ع الاوطان ف حرب رغيف 
واشوف وشوش الناس وهي اوكازيونات للحزن 
اخد بشر بالحضن يتلاشوا 
واشهد كلاب الليل واوباشه وهمّ ع الفمر الصناعي نجوم 
اشوف بشر بتحوم 
لابسين رقاب البوم وبينهشوا السهره 
كان حظي امشي ف مظاهره ومنكتبش قتيل 
اشوف دخول الفيل ناحية بلاد النمل 
وافضل لآخر وقت 
انا سرقت ياعمنا ولا اتسرقت 
الدنيا فرقت عن ما كنت بدأت 
وبقيت راكور ف حكاية بايخه وممله 
- والله - 
لولا اللي باقي ف برطمان النوتيلا 
ولولا بس الدنيا ماسكالي ذلّه
معلقاني بفرد ولا اتنين 
انا كنت هتحول سحاب عيّان 
واعطس مطر ف بلاد ماتعرفنيش
- كل الحشيش بيودّي على نفس الطرق - 
- كل الطرق بتودّي لسجارة الحشيش .
…….

قصائد الشاعر عمرو حسن . اجمل ما قال الشاعر عمرو حسن

قصيدة بحر للشاعر عمرو حسن

اللي بيحبك يصونك
يبقي نور ساكن عيونك
اللي بيحبك يهاودك
لما يظهر فيك جنونك
يبقي فرحك لما تحزن
لما كل الناس تخونك
اللي بيحبك يضمك
ولما تتكسر يلمك
تبقي حاسس أنه دمك
اللي بيحبك يشيلك
تندهله علطول يجيلك
يبقي عطشان من سبيلك
ممكنه من مستحيلك
تلقى دمعه سلسبيلك
يمسح الأحزان بكُمك
اللي بيحبك يحاوطك
يبقي مستحمل قساوتك
يبقي فاهم أمنياتك
إيه بتتمناه ف حياتك
جاف يقاوم استيكاتك
حضنه يشبه حضن امك
اللي بيحبك مرايتك
انت غايته وهو غايتك
يبقي حتة من حكايتك
يعني فاهمك من كلامك
من ملامحك وابتسامك
واما تكتر فيك الامك
يبقي متغرب بدونك
اللي بيحبك يشِّدك
لما تبقي وحيد ضعيف
يبقي اجمل حاجة عايشة
لما كل الكون سخيف
شخص لجل عيونك أنت
مستعد يعيش كفيف
شوف بقا مين اللي حبك
مين بيرهن عمره جنبك
أن لقيته بجد حبك
قول له كان الله ف عونك.
……

قصائد الشاعر عمرو حسن . اجمل ما قال الشاعر عمرو حسن

قصيدة انا مش كداب

أنا مش كداب
وقت اما رميت الدنيا ف ضهري
وجيت عندك وقفلتي الباب
كان قصدي ساعتها نلِّم دموعنا ونتّبسًِّم
مش قصدي عتاب
انا جيتلك وانا كل ما فيا
بيشوف انك كل ما ليا
ومشيت بمافيش
وحياة الحلو اللي مابيننا
لو كان فيه شيء حلو مابيننا
ماتكدّبينيش
ده انا قلبي بكل ما فيه شايفك
تايه في الرعشة اللي شفايفك بتخبيها
متفائل بيكي وحاسس انك قولتيها
بستني إشارة تكون أي بداية لبكره
وبشوفها بشارة
الضحكة اللي انتي ضحكتيها
انا مش كداب
ولا جيّ اقدّم للسايب
وجع المتساب
انا جاي عشان بس اقولك بزيادة غياب
وان كان فاضل ليا محبه
لو فاضل حب ولو حبّه
اسمعي مني كلامي وحسّيه
انا مش طالب إلا وجودك
حنًِّني والنبي قلب جنودك
عينك ومشاعرك وردودك
وافتحي بابك اللي قفلتيه
انا عمري ماخدت فرص من حد
ودفعت الاتمان الكاملة
انا عمري ماقولت ياريت لو كان
نرجع لزمان
ولا فكرت ف ايه هيكون
من بعد ماكان
بس الموضوع المره دي
يستاهل اجرب من تاني
انا مش عاوز اقدم أسباب
انا جي أقول
انا مش كداب
ف غيابك مهما مشيت ورضيت
وعملت صحاب واغاني وبيت
هفضل مكسور مهما اتلميت
هفضل شارد مهما اتونِّست
ريحتك روحي
بمشي ف أوقات والليل واسع
والناس نايمين والخوف لاسع
بتخيل ايدك مسكاني
وبشوف قفلة عينك ف الضحك
زي ماكنت بشوفها الأول
أتمنى الحاصل ده يطوّل
تتحرك مزيكا بسيطه
شبه الفستان اللي عليكي
اقفل على ايدي بلا ايديكي
يوجعني حنيني ويخنقني
دي اول مرة وعهد الله
اطلب من حد يصدقني
لو كنت اذيتك
انا اسف
اسف على قد مايرضيكي
وان عشت حياتي بقدم أسفي ومايكّفيش
هافضل اقدمه
على قد ما ربنا يديني ف الدنيا واعيش
وان كنتي اذيتي انا مسامح
انا جايب بكره اتفاوض بيه
على حصة وجعك في امبارح
باتخطى سنين ضاعت منّا
من غير ما ادخل حسبة تفاحتك والجنه
وبشوف الصح اللي انا ممكن أعمله دلوقت
اني أوقّف ماراثون الوقت
واجي لحدك واطلب فرصه
فرصه ياست الستات تاني
ليا وليكي
ربنا له حكمه يجمّعنا
وعشان كده كل ما نبعد بلاقيكي
كل مانتخاصم نتصالح
لما توافقي
هيبيع جواهرجي ف يوم خاتم
هيجيب مأذون عشا لولاده
هيزيد مشروب وهيبقى اتنين
ونضيف للدنيا اتنين عشاق
وان موافقتيش
فيه رزق هيبقى انتهى مقطوع
وانتي مترضيش تقطعي ارزاق
بزيادة العند اللي ف طبعك
بزيادة الخوف اللي متابعك
انا مش عاوزك في رهان بايخ
ولا جي ابيع سهم ف بورصه
انا جاي أقولك استاهل
اخد فرصه
صعبه عليكي ؟
فين كرمك
فين فرط ايديكي
ده انتي كريمه وقلبِك سابقك
وانا لسه حبيبك ومصمم
ياهتقبلي حالاً بيّا
ياهعيش باقي حياتي بخانقك
وهخانق كل اللي يفكّر بس يشاغلك
انا قررت ان انتي توافقي
ولغيت كل احتمالات الرفض
انتي الست اللي انا بتمنى
تغلبني التجاعيد ف وجودها
وابقى معاها
واحمي مقامها
انتي الست اللي انا مش مكسوف
انحني
او اعيّط قدامها
وانتي الانسانه اللي انا موجود
علشان تتحقق احلامها
وعشان ألحق حبل غرامها
لو تاه
أو داب
انا جي اطلب ايدك منك
يا ذنوبي اللي القلب بيستغفر
عنّها لو تاب
والله بحبك
وهحبك
وانا مش كداب.
......


قصائد الشاعر عمرو حسن . اجمل ما قال الشاعر عمرو حسن

قصيدة تقابلينى

كإنك فيلم خمسيني 
كإنك وردة في البدلة بيرويها مطر عيني
كإنك أرض 
كإني ف حضرتك بابقى ( روائي لا يمَل السرد ) 
أميل لك بس مابملِّك 
اشيلِكْ عمري ما أشيل لِك 
واغازلك شعر واغزِل لك
ضفاير شكّي ويقيني
تقابليني 
واطُل ف عينك استشهد 
يامزيكا بتتنهد 
شموسك كيف بتتجدد وضلِّك طيف مغطّيني 
أراقبك لما بتشاوري ف وقت ماتوصفي حاجه 
وعارفك لما بتناوري عشان تلهيني عن حاجه
وامتى بتبقي محتاجه اكونلك حضن ان يلزم 
واقولك امتى تحديدا بإن غرامنا لن يُهزم 
وعارف امتى بتبُصي بعين من خوف 
وصوتك وانتي تعبانه وشايله الهم
يا اقرب من فصيلة الدم 
ماكونش ازاي بقا مهتم 
بواحدة رضاها يحييني ؟
،،،
تقابليني
واراقب شعرك المقصوص 
كإن الليل نقص ساعتين 
جميل والله ولايقلك 
وفاتح للخيال طريقين
وطول عمرك بتختاري الهدوم بمزاج 
وعارفة تنقّي برفانك كإنه انتي 
ياواخده العقل من ايده كإنه ابنك
باقولك ايه 
خرجتي منين على الواحد خروج زهرة
خروج مزيكا من ( راجح داوود) مثلاً
بكل مافيكي من ستات فاجئتيني 
فتحتي الحلم والتأويل وسيبتيني
مهرج والسما سيما 
وطايش والطريق مراجيح 
تقول امي :
بقالك فترة مش مظبوط
تبان قلقان لكن مبسوط
ومتوتر كده وخايف 
ومش فاهماك 
تعبت معاك
تكونش ياواد عشقت جديد ! 
تقول امي ف وصف العيد 
( ياريتك جيتنا من بدري ) 
واظن الوصف ده ينفع يكون عنك
( ياريتك جيتي من بدري ) وخدتي الروح وخدتيني
تقابليني 
بدون اسباب 
زكاه عن ضحكتك مثلا
كفالة طفل نُصه يتيم 
هنتكلم عن الدنيا 
وعن حبي لشهر اتنين 
وممكن اقول اسامي صحابي بالترتيب
وتحكيلي عن القطة اللي ف عيونك 
ولون اوضتك 
هاقولك اني متورط بعصبيتي 
باحب احمد زكي جداً
موسيقى نهاية الكيت كات 
وممكن تحكي عن والدك 
وعن اخر خطوط الموضه ف العالم 
وعن حلمك تعيشي ف ارض محدوفة وبيت واسع
هنتكلم ف أي كلام 
وأي كلام ف ذاته كلام 
كلام تافه بدون ترتيب 
مسافه وقت تسمحلي اكون جنبك لاطول وقت 
- هتوحشني 
- وحشتي القلب من دلوقت
واحط ايديا علي قلبي واراقب مهرجان الصيف 
ابطل حب امتى وكيف
وحبك كيف ف شراييني !
،،،،،
تقابليني
عشان محتاج اقابلك موت 
فيه عندي حوالي ( ولا موضوع ) احب افتح كلام فيهم 
اصالح عمري ف وجودك
وانقّح نفسي م الأخطاء على حدودك
وعارف اني شيء بائس 
واني مصاب بمتلازمة ( وحشتيني ) 
وعارف برضه اني كسول 
بسيب كل الحاجات ع الأرض 
وريحتي كلها دخان 
وعارف برضه اني كمان بشجع نادي مش حباه 
ياستي حياة ولازم نختلف فيها 
يا أجمل حاجه ف الدنيا ابتليت بيها 
واطيب ركن ف الاوضه اللي جوايا 
ف قلبي فيه كذا حكايه 
وحابب احكي ساعديني 
تقابليني
…..
قصائد الشاعر عمرو حسن . اجمل ما قال الشاعر عمرو حسن

قصيدة بقيت عادى 

بقيت عادي
كإني ديكور 
مابتكلمش عن حاجه ومابعلقش
ومبكدّبش حد ف شيء ، ومبصدقش
ومش مهتم بالدنيا ولا بالحرب 
ومش باحزن على الرايح ولا الآتي 
ومش حابب ادخّل حد ف حياتي 
بقيت مابقيتش من ساعة وجع ف الروح 
ولا شرير ولا طيب ولا حساس ولا سادي 
بقيت كما طيف
بقيت كما ضيف 
بقيت ،، عادي
على الحال ده بقالي زمان
بقالي كام سنه يمكن 
ماحدش منّكم خد بال 
روبوت تشغيله بحجارة 
وطول ماحجارته فيه شغال 
شجر اخضر ما بيجرّحش عين الناس 
فانوس بيقيد ونوره سبيل 
ده مش تمثيل 
ولا تطويل ف مشهد ما 
لكن اسلوب وشكل حياه 
فماتلومنيش علي غيابي انا موجود 
ف اعيادكم 
واحزانكم 
صديق ف كافيه بيسرح ف اللي ضاع منه 
شريك منزل 
نزيل غرفه 
وجع بيبص م الشرفه 
انا موجود ومش بفسد فرح بينكم 
ولا بزعل قوي منكم 
انا على غير ما جوايا 
مهرج باسعد الشله 
وصاحب افيهات حاضره 
وعامل لجلكم حضره 
تقولوا ف وصفها الله 
فلو وجعاكو كلمة آه هابطلها
يومين عزله واكون احسن 
وهارجع تاني للشكل اللي كان بادي
انا عادي 
فخد راحتك
وقول عني اللي بتقوله 
انا وكتير من الناس اللي بقوا زيي 
مابنقربش م العالم عشان يحلو 
ومابنفسدش ابدا جو 
ومبنأذيش
لكن بنخاف من التجديد
من الناس اللي بيخشوا الحياه فجأة 
وبيفاجئونا بوجودهم 
عملنا سياج علينا عشان 
ماتتعشمش ناس فينا 
ف كل مساحه تلاقينا 
نميل لاغاني شتويه 
ولون غامق ف لبس عتيق
ريحتنا بيوت فارقناها 
هدومنا ناس قلعناها
وسمّيعه 
بنعرف نكرم العالم ونقراهم 
مبنملش من الحكايات 
ولينا ف كل صدر نبات 
ولينا الجدعنه الكامله 
ماننساش عيد ميلاد صاحب 
ومبنبخلش بالمواعيد 
جدير بيكم تساعدونا 
تغنولنا 
وتحكولنا 
وتسقونا 
يجوز دون قصد تحيونا 
وتدونا امل ف الضي
يجوز نتراضى على روحنا 
ونتطمن لبكره الجي 
يجوز بالوقت نتطمن 
ونرجع نبتسم عادي
....



reaction:

تعليقات